Wednesday, 12 July 2017

వినీత

సినీ నటి వినీత గుర్తుందా? లేదా? పోనీ ఇంట్లో ఇల్లాలు వంటింట్లో ప్రియురాలు సినిమా గుర్తుంది కదా! సౌందర్యతో పాటు నటించిన ఇంకో హీరోయిన్. గుర్తొచ్చింది కదూ! ఎంత బాగా నటించిందో కదూ! నిజానికి ఆ సినిమాలో సౌందర్య కన్నా తన నటనే బాగా నచ్చింది(సౌందర్యని తక్కువ చేయడం నా ఉద్దేశ్యం కాదు). నేపాలీ అమ్మాయిగా తన నటన మర్చిపోలేం. నిజంగానే నేపాలీ అమ్మాయా అని భ్రమించేంతగా అధ్బుతంగా ఉంటుంది ఆ సినిమాలో. ఆ సినిమా సూపర్ డూపర్ హిట్ తర్వాత ఆ అమ్మాయి నట జీవితం ఎక్కడికో వెళ్లిపోతుందనుకున్నా. కానీ అలా జరగలేదు సరి కదా అవకాశాలు లేక బీ గ్రేడ్ సినిమాల్లో నటించే పరిస్థితి. కొన్నిరోజుల తరువాత పేపర్ లోను, టీవీ లోను ఒక సంచలన వార్త ఒకటి వచ్చింది. అదేంటంటే వ్యభిచార కేసులో నటి 'వినీత' అరెస్ట్. ఆ అరెస్ట్ దృశ్యాలను టీవీలో చూసా. సాధారణంగా ఇలాంటి కేసుల్లో అమ్మాయికి మొహాన ఓ చున్నీ లాంటి దాన్ని చూడతారు (వాళ్లే చుట్టుకుంటారు). కానీ వినీత అలాంటిదేమీ చుట్టుకోలేదు సరికదా మొహాన ఓ చిరునవ్వుతో జీప్ ఎక్కింది... అచ్చం ఇంట్లో ఇల్లాలు వంటిట్లో ప్రియురాలు సినిమాలో హీరోయిన్ లా అమాయకంగా. జాలేసింది తనని అలా చూస్తే. సరే...ఆ కేసు  ఏమయ్యింది అన్న విషయం వదిలేస్తే, ఆ సంఘటన తర్వాత వినీత పూర్తిగా కనుమరుగైపోయింది. తను ఇప్పుడు ఏం చేస్తుందో!
నాకర్ధం కాని విషయమేమిటంటే వ్యభిచారం కేసులో అరెస్ట్ అవడానికీ తనకి చాన్సులు రాకపోవడానికీ ఏమిటి సంబంధం? కానీ జరుగుతోంది అదే కదా? కేవలం ఆ కేసులో అరెస్ట్ అయ్యింది కాబట్టి ఆమెని ఒక కులట లా చిత్రీకరించి సినిమాల్లో అవకాశాలు ఇవ్వడం మానేసారు మన సినీ రంగ పెద్దలు- అక్కడికి వీరంతా మహా పతిత్తులయినట్టు. సరే వీళ్ళని కాసేపు అలానే అనుకుందాం....మరి వీళ్ళకి పోర్న్ సినిమాల్లో నటించే సున్నీ లియోన్ ఎలా కనిపిస్తోంది? మహా పతివ్రతలా కనిపిస్తోందా? ఆవిడకి అన్ని కోట్లు ఇచ్చి తమ సినిమాల్లో ఎందుకు నటింపచేస్తున్నారు? అసలు ఆవిడ చేసిన పుణ్యమేమిటి? వినీత చేసిన పాపమేంటి?

మొన్నటికి మొన్న నటి 'శ్వేతాబసు ప్రసాద్' పరిస్థితీ అంతే. ఆ కేసులో అరెస్ట్ అయ్యిందో లేదో అవకాశాలు రావడం మానేసాయి. పైగా ఆవిడని ఏదో ఉద్దరించేసినట్టు నా తదుపరి సినిమాలో అవకాశమిస్తానని ఓ హీరో గారి ఉదాత్త ప్రకటన ఒకటి. అసలు జనాలకు వీటితో పనేంటి? ఫలానా నటి వ్యభిచారం చేస్తే ఏంటి? ఇంకేదో చేస్తే ఏంటి? ఆవిడ నచ్చితే ఆదరిస్తారు లేకపోతే లేదు. అంతే గానీ ఆవిడ వ్యభిచారం కేసులో అరెస్ట్ అయ్యిందా లేకపోతే దొంగతనం కేసులో అరెస్ట్ అయ్యిందా అని చూడరు కదా? ఏమిటో ఈ ద్వంద్వ  నీతి! 

2 comments: