ఇంటింటా దీపావళి

మనమంతా దీపావళి టపాసుల కోసం వేలకి వేలు ఖర్చు పెట్టేస్తున్నామనీ, డబ్బుని కాల్చి తగలేస్తున్నామనీ, ఆ డబ్బుతో చాలా మంచి పనులు చేయొచ్చనీ యింటా బయట అందరూ అంటుంటారు. ఆ డబ్బుతో అనాధలకి తిండి పెట్టొచ్చనీ, బాలబాలికలకు బట్టలు కొనివ్వచ్చనీ, ఎంతో మంది నిరుపేదలకి వైద్య సహాయం చేయొచ్చనీ, యింకా యిలాంటివి చాలా మంచి పనులు చేయొచ్చని అంటారు. నిజమే. సంవత్సరానికి ఒక్కసారొచ్చే దీపావళి గురించి బాగానే చెపుతున్నారు. సంతోషం. మరి సంవత్సరమంతా జరుపుకొనే దీపావళి మాటేంటి? అవును. నేను చెప్పే దీపావళి 'సిగరెట్ స్మోకింగ్' గురించి. దీపావళి రోజున మహా అయితే ఓ వెయ్యి రూపాయలు ఖర్చు పెట్టామనుకుంటే ఈ సిగరెట్ స్మోకింగ్ చేసే వారికి ఆ ఖర్చు కేవలం నెల రోజులకే సరిపోతుంది.యింకా ఎక్కువ కూడా అవ్వొచ్చు. అంటే సంవత్సరానికి ఎంతవుతుందో ఆలోచించండి. అలా అని దీపావళి రోజున పెట్టే ఖర్చుని నేనేమీ సమర్ధించటం లేదు. కేవలం దీపావళి గురించి మాత్రమే విమర్శించేవాళ్ళు సిగరెట్ స్మోకింగ్ ని కూడా విమర్శిస్తే బాగుంటుందని నా అభిప్రాయం. ఏమంటారు?